Pomoc:Dual

Pomoc:Dual Dual je numerus, kiž je z indogermanskeho časa zdźědźeny; ze słowjanskich rěčow pak su jón dźensa jenož hornjoserbšćina, delnjoserbšćina a słowjenšćina wobchowali. W hornjoserbšćinje so dual wužiwa, rěči-li so wo dwěmaj předmjetomaj, kiž njesłušatej do kategorije pluraletantumow. Wuwzaća su pady porowosće: Pola porowych dźělow drasty so plural preferuje (to su moje črije); wužiwanje duala (to stej mojej črijej) skerje signalizuje, zo so při tutymaj črijomaj wo porik njejedna. Pola porowych dźělow ćěła so wužiwanje plurala toleruje (na kolenach prosyć), dual so pak preferuje (na kolenomaj prosyć).